من قلم الكحل انا بتجنن
----------------------
بقلم محمد البلاط
=========
من غير خلخالك ولا شامتك
من عقلك فى القلب انا شايلك
من قلم الكحل انا بتجنن
وبغير لو لمسك او لطك
لو شوفت الهوا منك قرب
وفى شعرك حاول يقلب
انا دمى بيغلى فى عروقى
واعصابى بتفلت واتكهرب
وبلاش الشامه تصنعها
تنقلها يوماتى من مطرحها
خايف لخدودك دى تتعب
والقلم الناشف يوجعها
واخلع خلخالك بقى شيله
انا عايزك ترجع على الزيرو
خطاويك فى الشارع بتزلزل
والناس من الشبشب بيغيرو
خليك جوايا ومتربع
بطبيعتك وبلاش تتصنع
الليل بيجى ونتجمع
وعارفنى كويس وانا عارفك
من غير خلخالك ولا شامتك
من عقلك فى القلب انا شايلك
من قلم الكحل انا بتجنن
وبغير لو لمسك او لطك
تعليقات
إرسال تعليق