@ علي جبينك @بقلم الشاعر ✍️عاطف سالم نصر
@ علي جبينك @
لجل ما في عنيكِ بقيه
من اللي فات
علي جبينك بتضوي
صفحة الحب الاخيره
من كتاب الذكريات
لسه ياسمينك ما متش
والولد شايل في قلبه
لجل خاطرك
قصه لسه ما انتهتش
إغسلي بشعرك ظلام الليل
وهاتي الصبح من الاول نعيده
لجل ما القمر اللي ساكن في الخريف
علي الشجر يكمل نشيده
لو عرفتي إني بحبك
قد كل الرمل الاصفر
علي المواني والصحاري والشطوط
لوعرفتي إني بحبك
قد دقات قلبي
وأنفاسي من يوم ما إتولدت
ولغاية ما أموت
لو عرفتي كنتي وفرتي الليالي
وأفكارنا وإنتظارنا للسنين
كنتي خليتي الليالي
اللي إحنا عشناها
تخلف الف ليله وشمس تانيه
وصبح تاني فوق نهارنا
لجل ما في عنيكي
بقيه من اللي فات
هاتي نياتك وإضحكي
وغني وخلي صوت الضحك
يسرح في الفضا
خلي ضحكتنا تهاجر السكات
اللي إنغرس فوق صدرنا
ماانا أصل حبيتك
وانت في عنيكي الحنين
لجل ما في عنيكي
بقيه من اللي فات
علي جبينك بتضوي
صفحة الحب الاخيره
من كتاب الذكريات
علي جبينك
د. عاطف سالم نصر
تعليقات
إرسال تعليق