٨علموا أولادكم الرجولة
رسالة لكل أم علمي إبنك *ان الرجوله شخصية قوية مش جسم قوي وعضلات *ان الصوت العالي عيب للولد و البنت مش البنت بس *ان الراجل يعني مسئولية مش سيطرة وحب تملك وانانية *ان الحنية مش ضعف دى صفة إنسانية جميلة *احضني إبنك و بوسيه ما فيش حاجه إسمها بتدلعيه مش هيطلع راجل الحب مش دلع ... الولد والبنت محتاجين يحسوا بالاشباع العاطفى *اوعي تقولي له ماتعيطش انت راجل ! الرجوله مش جمود وتبلد مشاعر ... الدموع مشاعر اسمحيله يعبر عنها علشان يبقى إنسان يقدر مشاعر الآخرين ويشعر بآلامهم ويتعاطف معاهم *علمي ابنك يحضن أخته و يبوسها من وهما أطفال صغيرين و أنه أمانها و ضهرها وسندها وأقرب صديق لها تحس معاه بالأمان وتحكيله وتستشيره فى كل حاجة بدون خوف أو قلق وهو كمان يعتبرها صديقته ويفضفض معاها وياخد رأيها وما يبقاش بينهم أسرار *علميه ان هو واخته زي بعض ما فيش فرق في المعاملة أو الحب أو الصلاحيات أو العيب أو الحرام والحلال ... الولد والبنت جزاءهم عند ربنا واحد فى الغلط والصح *علمي ابنك عيب يشوف امه بتنظف وبتؤدى كل شغل البيت هو قاعد يتفرج على التلفزيون او يلعب لازم يساعدها ولو بحاجات بسيطة *عيب يشوفها شايله و ماياخدش منها ولو محتاجة حاجة من بره يعرض عليها إنه ينزل يجيبهالها *علمي ابنك يشيل الأكل مكانه و يغسل طبقه و يوضب سريره ويرتب دولابه ويعرف يشغل الغسالة وينشر هدومه مش عيب *عرفي ابنك ان الحاجه مش بتيجي بالساهل و ان زي ما بيحصل على طلباته لازم يتعب ويبقى له دور *لما تقولي له يعمل حاجه استني لما يخلصها ما تستسهليش و تخلصيها بداله علشان مايتعودش يبقى اعتمادى يستسهل ويرمي على غيره *فهميه يعني ايه واجب و أصول و يعني ايه صلات عائليه و سؤال على الكبير و المريض ... علميه يجامل أصدقائه وأهله وجيرانه وزملائه فى الحزن قبل الفرح *علميه يقف للكبير و يحترمه ويساعده لو احتاج *خليكي قدوه في معاملتك لأهلك و قولي لهم حاضر و من عنيا لما يطلبوا منك حاجة تعمليها او تجبيها لهم بحب وطيب خاطر *لو بتراعي والدك او والدتك خليه يشارك معاكي ويقعد معاهم و لو ربع ساعة و يعرف ان ده حقهم عليكم مش فضل منكم *اتكلمي معاه و احكي له و خدي رأيه و حسسيه ان رأيه يهمك من وهو طفل صغير علشان لما يكبر يحكي لك و ياخد رأيك ويتعود انه يتكلم معاكى *امدحيه قدامه وقدام الناس قولي انا خلفت راجل ووراها الصفه اللي بتشجعيه عليها : انا خلفت راجل بيساعد أمه ... انا خلفت راجل بيحب أخته ... انا خلفت راجل بيحترم أبوه ... انا خلفت راجل بيوعد و يوفي ... انا خلفت راجل بيساعد اى حد محتاج له بحب ورضا ... انا خلفت راحل بيفهم فى الأصول وعنده قيم وأخلاق ودين *ربي راجل بمعنى كلمة رجولة وليس ذكر
أحمد فوزي
تعليقات
إرسال تعليق