سنة مرت بقلم الشاعر .. د. ذوالفقار عبد الحسين
سنة مرت ..
ذوالفقار عبد الحسين
سنة مرت ولا طيفك يمر عالبال
لأن يابوي ذكرك لابسينة عگال .
لحد الآن تمشي سوالفك وياي
اسولف والحچي منك يصير إخيال
يل ملبس الليالي نجومهن عالعيد
وهسة بدون وجهك لابسات سمال
وانا عگبك يبوية بحال ظليت
احس بهدومي صارن ثق علي اثگال
ابوية ولو حچيت الچلمة تصبح سيف
الفعل يسبق حچيك وكلمة التنگال
انا بحال الفگد ما احسب اني ايام
سنة مرت واحسها اسنين الي وجبال
صرت بلا ابو لا ام ولا صحبان
فراك الي اعزهم فرهدالي الحال
آنة وياك اسولف حسبوا جنيت
واليباوع عليه يكول طكت إخبال
صوابك حار بس الناس بردانين
لچعة نار بعدك ذوبتلي البال
اخش بصفنة واطلع صافن هناي
انام وبيك احلم وابجي بجي اطفال
سنة مرت ولا شفت الصبح والليل
وگف ميل العمر والساعة بيها إشكال
تعال وشوف ابنك بالجروح يعيش
وسهم فگدك تعدى وصال بيه وجال
اليباوع بالوجه يلگة السنين اكيار
تعليقات
إرسال تعليق